Ikus-entzunezkoak
BINKE / 2022ko ekaina

Zinegoak jaialdiko zazpi film Galdakaoko Torrezabal Kultur Etxean eskainiko dira

TESTUA: Erredakzioa
ARGAZKIA: Zinegoak 2022

Martitzen eta eguen honetan, hilak 14 eta 16, Zinegoak jaialdiko zazpi film Galdakaoko Torrezabal Kultur Etxean eskainiko dira 19:00etatik aurrera, tartean Euskal Herrian sortutako lanak ere badirela.

Zinegoak jaialdia Galdakaoko zinema-aretora itzuliko da berriz. Torrezabal Kultur Etxean sei film labur eta film luze bat proiektatuko dira bi jardunaldi ezberdinetan: ekainaren 14an, martitzena, eta ekainaren 16an, eguena, 19:00etan hasita. Sarrera gainera doako izango da, aforoa bete arte.

Aurten Bilboko Gaylesbitrans Zinema eta Arte Eszenikoen Nazioarteko Jaialdiaren XIX. edizioa ospatuko da, Zinegoak izenarekin ezagunagoa. Edizio berri honek, «gure nortasuna eraikitzeko, geure burua birpentsatzeko eta, hala nahi izanez gero, geure burua berrasmatzeko aukera amaigabean» jartzen du fokua, antolatzaileek diotenez: «sexu-aniztasunari, orientazioei, genero-identitatearen eraikuntzari edo sexualitateari lotutako beste edozein elementuri irekita, nor garen eta nola izendatu nahi dugun erabakitzeko askatasuna eta zilegitasuna aldarrikatzea da helburua».

Horrela islatzen da edizio honetako irudian, kartel ezberdinen bidez «geure burua izendatzeko edota modu berriak sortzeko aukera ematen baitigu, modu librean eta inposatutako etiketarik gabe» bizitzeko gonbidapen gisa.

Testuinguru horretan, eta datorren ekainaren 28a LGBT+ Harrotasunaren Nazioarteko Eguna dela eta, Galdakaoko Udalak, bere Berdintasun Arloaren bitartez, ekimenarekin bat egiten du zazpi pieza zinematografiko hauen programazioarekin parte hartuz, tartean euskarazko batekin —Berak baleki (2021)—:

Ekainak 14, martitzena

• Les filles ne marchent pas seules la nuit. Kanada | 2020 | 17’ | Fik | J.B. frantsesez, azpitituluak gaztelaniaz eta euskaraz.
• Elsa. Katalunia | 2021 | 12’ | Fik | J.B. katalanez, azpitituluak gaztelaniaz eta euskaraz.
• 17 minutos con Nora. Espainia | 2021 | 19’ | Fik | J.B. gaztelaniaz
• No deberías. Euskal Herria | 2021 | 15’ | Fik | J.B. gaztelaniaz.
• Berak baleki. Euskal Herria | 2021 | 16’ | Fik | J.B. euskaraz, azpitituluak gaztelaniaz.
• To the future, with love. AEB | 2021 | 7’ | Ani | J.B. ingelesez, azpitituluak gaztelaniaz eta euskaraz.

Ekainak 16, eguena

• Nudo mixteco. Mexiko | 2021 | 91’ | Fik | V.O. mixtekoz eta gaztelaniaz, azpitituluak ingelesez eta euskaraz.