Bihar irekiko da Galdakaoko merkataritza suspertzeko dirulaguntzak eskatzeko epea

TESTUA: Irati Alonso García
ARGAZKIA: Google Maps

Galdakaoko udabaltzak joan den iraileko osoko bilkuran herriko saltoki txikiei laguntzeko dirulaguntzak sortzeko oinarriak onartu zituen. Guztira 82.000 euro bideratuko dira horretarako eta bihar, otsailak 17, zabalduko da laguntzak eskatzeko epea.

Galdakaoko merkataritza bultzatzeko helburuz, ildo horretan doazen dirulaguntzak sortzeko oinarriak onartu zituen udalbatzak iraileko osoko bilkuran. Biziberri izeneko laguntza horien helburua «udalerriko merkataritza sarea datozen aldaketei aurre egiteko prest egotea da, batez ere, metroaren iritsierak ekar ditzakeen aukerei begira».

Ekimen honen baitan hiru lerro espezifiko ezarriko dira jarduera desberdinei hobariak emateko: txikizkako merkataritza eskaintza auzo periferikoetara iristea, alokairurako eta inbertsiorako laguntzen bidez; merkataritza guneko lokalak eraberritzea, modernizatzea eta hobetzea; eta herriko hizkuntza paisaia euskalduntzea.

Diruz lagundu daitezkeen gastuak 2023ko urtarrilaren 1etik 2025eko otsailaren 16ra egindakoak izan behar dira eta herritarrek bihartik, otsailak 17, martxoaren 28ra bitarte eskatu ahal izango dituzte laguntzak Galdakaoko Udalaren webgunearen bitartez.

Halaber, laguntza behar duten interesdunek hitzordua eskatu ahal izango dute 944 010 580 telefonoan, eskaera Behargintzako udal bulegoan egin ahal izateko, Zabalea auzoko 35 zenbakian. Laguntzen eskaera egin ahal izateko BakQ ziurtagiri elektronikoa edukitzea nahitaezkoa izango da.

Hauek dira Biziberri dirulaguntzen ezaugarri nagusiak:

– Dendarik ez dagoen auzoetan komertzioak zabaltzeko dirulaguntzak:

• Aperribai, Zuatzaurre, Tximelarre, Bengoetxe, Olabarrieta eta Urtebietan oinarrizko beharrak aseko dituzten auzoko dendak irekitzeko
• Denda txikiei bideratua: autonomo gisa ari direnentzat edo 5 langile baino gutxiago dituzten enpresentzat
• Alokairuak ordaintzeko edo merkatal jarduerarako beharrezko inbertsioak egiteko
  
  Alokairua: 
  1- Alokairuaren %50 ordaintzeko
  2- Hilean gehienez 291,67 euroko laguntzak
  3- 24 hilabete, gehienez
  
  Inbertsioa:
  1- Inbertsioaren %50 ordaintzeko. Gehienez, 3.000 euro
  2- Zenbatekoa 3.300 eurokoa izan liteke, kasu hauetan:
  · Merkatal elkarte bateko kide izatea
  · Irisgarritasun lanak egitea
  · Energia eraginkortasuna hobetzeko inbertsioak izatea

– Komertzio guneetan dendak berritu, modernizatu eta hobetzeko dirulaguntzak:

• Erdigunean eta Urretan
• Dendak berritzeko, irisgarritasuna hobetzeko, modernizatzeko eta erakargarriago egiteko
• Denda txikiei bideratua: autonomo gisa ari direnentzat edo 5 langile baino gutxiago dituzten enpresentzat
  
  Inbertsioa:
  1- Inbertsioaren %50 ordaintzeko
  2- Gehienez, 3.000 euro
  3- Zenbatekoa 3.300 eurokoa izan liteke, kasu hauetan:
  · Merkatal elkarte bateko kide izatea
  · Irisgarritasun lanak egitea
  · Energia eraginkortasuna hobetzeko inbertsioak izatea

– Paisaia linguistikoa euskalduntzeko dirulaguntzak:

• Irudi korporatiboa, errotuluak, publizitatea edo webguneak euskalduntzeko:
  1- Euskara hutsezkoetan gastuaren %50 ordainduko da, gehienez 350 euro.
  2- Euskaraz eta gaztelaniaz egindakoetan, gastuaren %30 ordainduko da, gehienez, 175 euro
• Denda txikiei bideratua: autonomo gisa ari direnentzat edo 5 langile baino gutxiago dituzten enpresentzat