Andra Mariko ikasleak eurek sortutako auto ekologikoarekin lehiatuko dira San Mamesen
TESTUA: Irati Alonso García
ARGAZKIA: Galdakaoko Udala
Galdakaoko Andra Mari Lanbide Heziketako ikasleek ‘Greenpower’ proiektuan parte hartu dute eta auto elektriko ekologikoa eraiki dute. Domekan, martxoak 5, San Mamesen lehiatuko dira eurek sortutako ibilgailuarekin.
Galdakaoko Andra Mari Lanbide Heziketako ikastetxeak ‘Greenpower’ proiektuan parte hartu du, Udalaren babesarekin. Honen bitartez, ikasleek euren auto elektriko ekologikoa eraikitzen dute, urtean zehar antolatzen diren lehiaketetan parte hartzeko.
Edizio honetan San Mamesen egingo dute lehen txapelketa domekan, martxoak 5, eta Andra Mari Lanbide Heziketako ikasleek eurek eraikitako auto elektriko ekologikoarekin parte hartuko dute. Aurretik, autoa probatzeko, entsegua egingo dute martxoaren 3an Elexaldeko kiroldegian, 11:30ean.
Egitasmoaren antolatzaile den Bridgestonek Bizkaiko Foru Aldundiarekin eta proiektuan parte hartzen duten herriekin aurtengo edizioa aurkezteko agerraldia egin zuen Bilbon eta Iñigo Hernando Galdakaoko alkateak parte hartu zuen hitzorduan.
San Mamesen domekan lehiatu ondoren, apirilaren 2an Etxebarrin izango den zirkuitoan ere parte hartuko dute Andra Mariko ikasleek eta Galdakaoko kaleetan zehar urriaren 29an izango dira.
