‘Arin Arin erbiaren abenturak’ antzezlana eskainiko du Panpotx Kultur Elkarteak
TESTUA: Irati Alonso García
ARGAZKIA: Panpotx Kultur Elkartea
Panpotx Kultur Elkarteak umeei zuzendutako ‘Arin Arin erbiaren abenturak’ antzezlana eskainiko du. Hiru saio eskainiko ditu Torrezabalen, Aperribaiko liburutegian eta Usansolon. Albiste honetan batu ditugu data guztiak.
Bere etxea zulo batean dauka eta oso ilun egoten da beti Arin Arin erbia. Familiarekin bizi da, baina etxean aspertzen denez, mundua ezagutzera joatea erabaki du. Istorio hau abiapuntu hartuz, umeei zuzendutako saioa aurkezten du Panpotx Kultur Elkarteak ‘Arin Arin erbiaren abenturak’ antzezlanean.
«Haurrek gaur egun lotan dauden balioak berpiztu ahal izango dituzte: errespetua, adiskidetasuna, ekologia, elkarlana», azaldu dute Udaletik. Hain zuzen Galdakaoko Udalak eta Argizai taldeak antolatuta, hiru saio eskainiko ditu Panpotx Kultur Etxeak.
Bihar Torrezabaleko haur liburutegian izango dira 17:30ean, ekainaren 8an Aperribaiko liburutegian 18:00etan eta hilaren 13an Usansoloko haur liburutegian 17:30ean.
Antzerki taldeak adierazi duenez, antzezlana lau eta hamar urte arteko haurrei zuzenduta dago.
