Athletic Cup futbol txapelketaren egoitza izango da Galdakao aurten ere

TESTUA: Irati Alonso García
ARGAZKIA: Galdakaoko Udala

Athletic Clubek haur eta gaztetxoei zuzendutako AC txapelketaren hirugarren edizioa antolatuko du ekainean eta iaz moduan, Galdakao izango da lehiaketako egoitzetako bat. Santa Barbara eta Elexalde futbol zelaietan jokatuko dira txapelketako zenbait partida.

Athletic Clubek hirugarren urtez jarraian antolatuko du haur eta gaztetxoei zuzendutako AC txapelketa ekainaren 3tik 8ra. Pasa den urtean bezala, hainbat egoitza izango ditu lehiaketaren lehenengo faseak, eta bi Galdakaoko Santa Barbara eta Elexalde futbol zelaiak izango dira.

Nazioartean ere ospea lortu duen txapelketa da AC Cup. Edizio honetarako 1.600 parte hartzaile baino gehiagok eman du izena, eta beste lurraldeetatik etorritako jokalarien kopurua bikoiztea aurreikusten dute antolatzaileek. «Erakusleiho paregabea da Galdakaori ikusgarritasuna emateko eta haren ekonomian eragin positiboa sortzeko, udalerriko merkatariei eta ostalariei ere on eginez», azaldu dute Udaletik.

Txapelketak Futbol 11ko kategoria hauek izango ditu: gazteen bakarra (2006an, 2007an eta 2008an jaiotakoak) kadeteak (2008 eta 2009), emakumezko kadeteak eta Gaztetxoak (2010 eta 2011). Futbol 7an, bestalde, kimuak (2015 eta 2016) eta emakumezko gaztetxoak, umeak (2012 eta 2013) eta emakumezko Umeen kategoriak sartu dira lehen aldiz.

Parte hartzen duten klub guztiek bermatuta izango dute gutxienez partida bat Lezaman jokatzea, baita San Mamesen jokatzeko aukera urrezko fasean finala lortzen badute. Gainera, Athleticen zelaia inaugurazio ekitaldiaren eszenatokia izango da ekainaren 6an.

Egutegi osoa, emaitzak, sailkapenak, estatistikak eta egoitzetako informazioa zuzenean kontsultatu ahal izango dira AC CUPen aplikazio ofizialean.