Bertan behera utzi dituzte Meatzetan kamioiak gelditzeko protestak, Ertzaintzaren aginduz

TESTUA: Irati Alonso García
ARGAZKIA: BINKE

Meatzetan kamioiak geldiarazteko kontzentrazioak bertan behera utzi ditu Geltokia Erdigunean plataformak, Ertzaintzaren aginduz. Hala ere, geltokia erdigunean eskatzen jarraituko du eta Bizkaiko Batzar Nagusietara joango dira bihar, irailak 13.

Usansolotarrek Metro geltokia erdigunean eskatzen jarraitzen dute, bidean oztopoak aurkitu dituzten arren. Geltokia Erdigunean plataforma Meatzetan obretako kamioiak geldiaratzen ibili da ekainetik baina aste honetan bertan behera utzi behar izan dituzte kontzentrazio hauek, Ertzaintzaren aginduz.

Orain arte Ertzaintzak kamioiei buelta emateko agindu dien arren, oraingoan kontzentrazioa egiteko baimenik ez duela azaldu dio Ertzaintzak Geltokia Erdigunean plataformari. «Esan ziguten aurreko patruilak erratuta zeudela», adierazi dio plataformal BINKEri.

Hala ere, Meatzetan ez bada ere, aldarrikapenarekin jarraituko dute usansolotarrek eta bihar, iraila 13, Bizkaiko Batzar Nagusietara joango dira, han plataformak bultzatutako arauz besteko proposamena eztabaidatuko delako.

«Gure proposamenak EH Bildu, Elkarrekin Podemos eta PPren aldeko botoa izango du, baina EAJ eta PSOEk emendakin bat aurkeztu dute. Beraz, argi jakanarazi behar diegu bi alderdi horiei zer den Usansolok eskatzen duena: geltokia erdigunean!», adierazi du Geltokia Erdigunean plataformak.

Horretarako, Bizkaiko Batzar Nagusien aurrean kontzentratuko dira bihar 9:00etan eta Usansolotik trenez joango dira 8:15ean: «Zenbat eta gehiago izan, argiago izango dute zein den gure posizioa! Zabaldu deialdia eta anima zaitez!».