Bueltan dira BINKEren txiste txarrak sareetara, hilabeteko lehenengo astelehenetan

TESTUA: Jon Gomez Garai
ARGAZKIA: Pavel Danilyuk

Albiste txarren garaian, txiste txarrak ekarri gura ditu BINKEk berriro bere sareetara! Laburrak, euskaraz eta, lelokeria galantak izango badira ere, hilabete berriari ekiteko irribarre bat ateratzen saiatuko direnak! Komunikabidearen webgunean jakingo duzu non argitaratuko diren hilabeteko lehenengo astelehenetan.

Edozein egunkari ireki, telebistako albistegiak piztu, irratiko uhinekin bat egin, sare sozialetako foroetan sartu… eta denak dira albiste txarrak, kexak, kritika ez-eraikitzaileak eta umore txarra. Tira, beti ez, baina gehienetan ezin ukatu horrela denik. Eta komunikabideak, gainera, albiste txarren iturri nagusi bilakatu dira azkenotan. Eta horrekin amaitzeko asmoz, bere txikitasunetik, BINKEk berriz ekingo dio hilabeteko lehenengo astelehenetan txiste labur bat —euskaraz, zelan bestela— argitaratzeari bere sare sozialen bidez. Webgunean ez dira argitaratuko.

Herritar askorentzat astelehenak izan ohi dira asteko egunik gogorrenak. Eta are gogorragoak hilabeteko lehenengo astelehenak badira. Baina horrekin amaitu eta, lanegunei irribarre batekin ekiteko helburuarekin, hilabetero txiste txar —edo ez— eta labur bat argitaratuko du BINKEk bere Telegrameko kanal publikoan eta Instagram zein Facebook-eko kontuetan. Eta ahaztu gabe BINKEren WhatsApp zerbitzua, non egunaren amaieran eguneko albisteak titularretan labur-labur zabaltzen diren. Bertan ere batuko du hedabideak asteleheneko lelokeria!

Aurrerantzean irakurri ahal izango diren txiste horiek, 2023an zehar eta 2024ko hasiera arte egiten zuen bezala, BINKE bere hileroko Aginke atalean argitaratutakoetatik berreskuratzen joango da 2025eko abendura bitarte. Hilabeteko lehenengo astelehenetan hortaz, aipatutako sareetan, goizeko 07:00 aldera irakurri ahal izango dira lelokeriatxo horiek. Eta egin dezagun irribarre, ’fake news’ eta umore txarraren garaian irribarre bat garaipen handi bat izango delako denontzat!