EAEko Auzitegi Nagusiak onartu egin du Usansoloren segregazio prozesuarekin jarraitzea

TESTUA: Irati Alonso García
ARGAZKIA: Jon Gomez Garai

Espainiako Abokatutzak helegitea jarri zion Bizkaiko Batzar Nagusiek Usansolo udalerri bilakatzeko hartutako erabakiari. EAEko Auzitegi Nagusiak ordea atzera bota du errekurtsoa, «auzia ebatzi bitartean udalerri berria martxan jartzeko izapideek aurrera jarraitzen badute, ez dagoelako arrisku itzulezinik».

EAEko Auzitegi Nagusiak Espainiako Abokatutzak Bizkaiko Batzar Nagusiek Usansolo udalerri bilakatzeko hartutako erabakiari jarritako helegitea atzera bota duela iragarri du gaur goizean auto baten bitartez. Estatuko Abokatutzak bost egun ditu orain alegazioa jartzeko.

EAEko Auzitegi Nagusiko Administrazioarekiko Auzien Gelako 1. sekzioaren esanetan, «auzia ebatzi bitartean udalerri berria martxan jartzeko izapideek aurrera jarraitzen badute, ez dago arrisku itzulezinik», Espainiako Abokatutzak argudiatzen zuen moduan.

Otsailaren 16an sinatu zen auto judizialak adierazten duenez, Roberto Hernández Estatuaren Euskadiko abokatuak arrazoitu zuen banantze-izapideekin jarraitzen badute, baina gero bateratzea agintzen bada, «berreskuratu ezin den gastu publikoa egongo litzatekeela».

Besteak beste, hogeita bost funtzionario eskualdatzea edo zerbitzuak berrantolatzea aipatzen zituen Estatuko Abokatutzak jarritako helegitean.