Galdakao zaintzeko eta bizikidetza sustatzeko kontzientziazio kanpaina jarri du martxan Udalak
TESTUA ETA IRUDIAK: Irati Alonso García
Galdakaoko Udalak herriaren zaintza eta bizikidetza sustatzeko kontzientziazio kanpaina abiatu du. Ekimenak lau ildo nagusi ditu: naturguneak babestea, txakurren gorotzak batzea gogoraraztea, kerik gabeko guneak errespetatzea, eta eremu publikoan dauden elementuak zaintzea.
Galdakao guztiona eta guztiok zaindu beharrekoa dela azpimarratu nahi du Udalak eta horretarako kontzientziazio kanpaina abaitu du. Herritarrek aurrekontu parte-hartzaileetan proposatutako neurriak eta kexak kontuan hartuz, lau ildo nagusiko kanpaina martxan jarri du.
Gaur, apirilak 16, aurkeztu dute kanpaina Edurne Espilla eta Maite Arandia zinegotziek. «Bizikidetzan aurrera egin nahi dugu eta horregatik, herritarren eskaerak kontuan hartuz, plan integrala egitea erabaki dugu», azpimarratu du Arandiak.
Bekean izan da agerraldia, izan ere, han hasi da kanpaina. Naturguneak babestea da honen lehen ildoa eta Bekea auzotik jarri dituzte honezkero kartelak herritarrak kontzientziatzeko. «Galdakao harrigarria da lema aukeratu dugu herrian harritzen gaituzten eremu asko ditugulako hurbil, oinez bisitatu ahal direnak», adierazi du Espillak. Beste naturgune batzuetan ere jarriko dituzte kartelak aurrerago, zaintza «oso garrantzitsua» dela gogorarazteko.
Kanpaina honen baitan Udalak bidali nahi duen beste mezuetako bat txakurren jabeei zuzenduta dago. «Hainbat kexa jasotzen ditugu eta jarraitu nahi dugu mezu argia bidaltzen: gorotzak batu behar dira. Horretarako ere kartelak jarriko ditugu aurrerago herrian zehar», azaldu du Espilllak.
Bestalde, kerik gabeko guneak errespetatzea ezinbestekoa dela gogorazi du zinegotziak: «Hasieran umeak dauden eremuetatik hasiko gara mezua zabaltzen kartelen bitartez: eskoletan, kiroldegietan… Eusko Jaurlaritzak ezarritako lekuetan».
Azkenik, eremu publikoa «guztiona eta guztiok zaindu beharrekoa» dela nabarmendu du Espillak, espazio publikoan dauden elementuak zaintzeko deia eginez. «Erabiltzea ondo dago, baina babestea ere», azpimarratu du.
«Lau ildo hauek azken helburu batera eramaten gaituzte: denon artean herriko txoko guztiak zaintzera», adierazi du. Hemen Espillaren hitzak kanpainaren inguruan:
