Greba mugagabea bertan behera utzi dute Maxameko langileek
Langile borroka
BINKE / 2022ko martxoa
Greba mugagabea bertan behera utzi dute Maxameko langileek
TESTUA: Jon Gomez Garai
ARGAZKIA: Aitzol Zamalloa
Maxameko langileek greba mugagabeari amaiera ematea erabaki dute gaur bertan, aldeko %70eko botoekin. Horrela, 30 eguneko lanuztea amaitu eta bihar 06:00etako lehenengo txandarekin itzuliko dira lantegira. Zuzendaritzak egindako azken proposamena —langileek onartutakoa— batu du Binkek ondoko albistean.
Bigarren bozketa egin gura izan dute sindikatu nagusiko kideek —UGT-koek— gaur goizean egindako langileen arteko asanblada informatiboan. Horrela ba, Asanblada Orokorrik ez egitea adostu eta bigarren bozketa antolatu dute arratsalde bererako.
Greba mugagabean jarraitu ala ez bigarrenez bozkatu ahal izan dute Maxameko langileek, eta aurrekoan langileen %53,9 batek greban jarraitzearen alde egin bazuen, gaur kopuru hori %28,71ra jaitsi da. Horrela ba, zuzendaritzak egindako azken proposamena —behean batutako dokumentua— onartu eta bihar, barikua martxoak 18, langile guztiak lanera itzuliko dira, goizeko seiretako lehenengo txandakoetatik hasita.
Otsailaren 16tik izan da greban lehergaien enpresako langileen gehiengo nagusia, eta 30 egunen ostean, bertan behera geratu da Zuhatzuko lantegi historikoko greba. Hala ere, Enpresa Batzordeko sindikatuek esan dute oraindik badagoela zer negoziatu, eta datorren 21ean zehaztuko dutela negoziazio-mahaia nola eratuko duten.
Langileen %70ak lanera bueltatzearen alde egin badu ere, haserrea eta frustrazioa nabaritu du Binkek zenbait langileren artean, «enpresa honetako sindikatu nagusiak Madrilera eta karrera politiko-sindikala egitera gure baldintzetara begira baino gehiago» daudelakoan.
Hauxe izan da Maxameko zuzendaritzak egindako azken proposamena:
