Ibilaldian antolatuko den ikasleentzako erronka prestatzeko boluntario bila dabiltza
TESTUA: Irati Alonso García
ARGAZKIA: Ander Elordui
Ibilaldia antolatuko du Eguzkibegi Ikastolak maiatzaren 25ean eta egun horretan, besteak beste, DBHko ikasleentzako erronka egingo dute. Jolas-joko hau prestatzeko saioa egingo dute martxoaren 29an eta hitzordurako boluntario bila dabiltza antolatzaileak.
Bigarrenez hartuko du Ibilaldia jaia Galdakaok. Lehenengo edizioa 2009ko maiatzaren 31n antolatu zuen Eguzkibegi Ikastolak, eta bigarrena aurtengo maiatzaren 25ean egingo du.
Egun horretarako egitarau zabala antolatuko dute eta oraindik honen xehetasunak ezagutzera eman ez dituzten arren, Ibilaldian urtero egiten den erronka izeneko jolas-joko bat egingo dutela iragarri dute antolatzaileek, DBHko ikasleei zuzendutakoa.
Aurten formatu aldaketa batekin garatuko dute eta horregatik laguntza eskatzen ari dira. «Erronka ahalik eta arrakastatsuena izan dadin prestatzen ari garen jolas-jokoa testatu behar dugu eta horretan lagundu diezagukezu», adierazi dute Ibilaldiako antolatzaileek.
Guztira 100 lagun behar dituzte martxoaren 29an egingo duten prestakuntza saiorako eta izen-ematea zabalik dago honezkero formulario honetan. Boluntarioak ezin dira parte-hartuko duten ikasleak izan.
Behin izena emanda, WhatsApp talde batean sartuko dituzte boluntarioak eta aukeran egongo diren kolore-talde batean kokatu ahal izango dute haien burua.
Hau izango da egun horretako ordutegia:
10:30 Ikastolako goiko patioan elkartu
10:40 Azalpenak jaso
11:00 Erronkaren hasiera
13:00 Erronka amaiera eta batu-batu txapelketa
13:30-14:00 Bazkaria
