Pilar Riañok eta Txalaparta Kopik irabazi dute «Berria zabalik» kanpaina
Merkataritza
BINKE / 2021eko abendua
Pilar Riañok eta Txalaparta Kopik irabazi dute «Berria zabalik» kanpaina
TESTUA: Jon Gomez Garai
ARGAZKIA: Galdakaoko Udala
Gaur ezagutu dira azaroaren 22tik abenduaren 1era bitarte Berria egunkariak, Galdakaoko Udalak, Dendari Elkarteak eta Kutxabankek abian jarritako «Berria zabalik» kanpainaren irabazleak.
Tokiko eragileei ikusgaitasuna eman eta kontsumoa sustatzea, eta euskaraz bizi eta irakurtzeko ahaleginean pauso bat aurrera egitea. Horiexek izan dira azaroaren 22tik abenduaren 1era bitarte Galdakaoko Udalak, Berria egunkariak eta Dendari Elkarteak abian jarritako «Berria zabalik» kanpainaren helburuak.
Kanpaina honetan 41 establezimenduk hartu dute parte, eta hauetako bakoitzean egindako erosketaren truke, bezeroak 1.000 euroko zozketa batean hartu du parte. Abenduaren 3an egin zen zozketa, Euskararen Nazioarteko Egunarekin, eta gaur eman dira ezagutzera bi irabazleak.
Horrela ba, «Berria zabalik» kanpainaren irabazleak izan dira Pilar Riaño eta Txalaparta Kopi denda. Lehenak, Kutxabanken eskutik, tokiko merkataritzan inbertitzeko 1.000€ irabazi ditu; bigarrenak aldiz, Berrian mila euroko balioa duen publizitatean inbertitzeko aukera.
«Aurrera begira, bai Berriak eta bai Galdakaoko Udalak lanean jarraituko dute, tokiko eragileekin batera euskararen erabileran eta irakurzaletasunean eragiteko», adierazi du sari banaketan Edurne Espilla Euskara eta Komunikazio zinegotziak.
