Santakurtzetako lehenengo asteburua ez da euritsua izango, iragarpenen arabera
TESTUA: Jon Gomez Garai
ARGAZKIA: Stevecole
Santakurtzen aurreko egunak euritik bizitzen ari bagara ere, jaien hasieratik aurrera asteburu osoa aterri izango dugula aurreikusten dute meteorologia agentziek, tenperatura ez hotzegiekin gainera. Eguraldiaren hiru iragarpen desberdin hartuta osatu du BINKEk asteburuak ekar dezakenaren aurreikuspena, ondoko albistean.
Bustiak izaten ari dira 2024ko Santakurtzen aurreko egunak, eta inor ez litzateke harrituko aurtengo jai galdakoztarrak bustitik igaro beharko genituzke ere. Ez litzateke lehenengo urtea izango. Baina iragarpenek ez diote hori, behintzat.
Euskalmet, Meteoblue eta Aemet agentzien arabera bariku eguerdirarte —jaiak hasi aurreko orduak iritsi arte— euria egin dezake. Agentzia batzuek euria egiteko %40ko aurreikuspena egin dute, beste batzuek aldiz %100ekoa. Baina denak bat datoz ordu batean: jaiak hasterako, desfilearekin 19:00etan, aterri egongo da. Ez du euririk egingo. Eta hala espero da, barikuko arratsaldeko lehenengo ordutik asteburua domeka gauean amaitu arte. Astelehen edo martitzenerako iragarpena okertu egiten da eta euria egin dezakela iragarri dute zenbait agentziek. Baina gutxienez, iragarpenek asmatuz gero, badirudi Galdakaoko Santakurtzen lehenengo asteburua lehorrean igaroko dugula.
Tenperaturak sasoi honetarako ohikoak izango omen dira —beti ere aipatutako agentzia meteorologikoen arabera—. Eguzkia lagun izan bitartean, tenperaturak 15-20 gradu bitartean izango dira, eta gauetan freskatu egingo du, tenperaturak 10-12 gradura jaitsi arte.
