Udalekuetan izena emateko epea zabalik dago
TESTUA: Irati Alonso García
ARGAZKIA: Oksanashufrych
Galdakaoko eta Usansoloko umeek aukera izango dute aurtengo udan ere aisialdiaz euskaraz gozatzeko. Udalak hainbat udaleku antolatu ditu eta honezkero zabalik dago hauetan izena emateko epea.
Urtero moduan, ume galdakoztarrek eta usansolotarrek aukera izango dute udan aisialdiaz euskaraz gozatzeko. Udalak udalekuak antolatuko ditu uztailean zehar eta Galdakaoko topaguneek ere ekintzak eskainiko dituzte.
Uztailean 12eta 16 urte bitarteko gazteek udaleku ireki batean parte hartzeko aukera izango dute. Hilaren 3tik 21era, Aperribai, Usansolo, Indarra eta Plazakoetxeko Topaguneetan ekintza eta irteerak antolatuko dira, besteak beste, scape room, espeleologia, eskulanak, irteerak hondartzara eta argazkilaritza tailerr
Gazte bakoitzak txanda baten, bitan edo hiru txandatan eman ahalko du izena, ekainaren 4ra bitarte. Udaleko webgunetik edo Torrezabal Kultur Etxean egin daiteke eta hauek dira prezioak: aste bat 30 euro, bi aste 50 euro eta hiru aste 60 euro. Eskaintzen diren plazak baino eskari handiagoa balego, zozketa egingo litzateke ekainaren 7an, Gazteria Arloan.
Udalekua hasi baino bi aste lehenago, informazio bilera bat egingo da onartutako gazte eta guraso edo tutoreekin, informazio guztia eman eta zalantzak argitzeko. Informazio gehiago eskuratu daiteke topaguneak@argizai.org helbidera idatziz edo 688 88 32 89 telefonora deituz.
Bestalde, kirol udalekuetan izena emateko epea ere zabalik dago. Online eman daiteke izena, edota presentzialki Urretako zein Unkinako kiroldegietan. 5 eta 12 urte bitarteko ume eta gaztetxoei bideratutako udalekuak izango dira eta hiru txandatan gauzatuko dira: ekainaren 26tik 30era; uztailaren 3tik 7ra eta uztailaren 10etik 14ra.
Abonatuentzat 70 euroko prezioa izango du txanda bakoitzak eta gainontzekoentzat 84. Jarduerak Unkinako eta Urretako kiroldegietan izango dira, 09:00etatik 14:00etara; haurrak ekarri eta eramateko zerbitzua, berriz, 08:30etik 09:00etara eta 14:00etatik 14:30era egongo da erabilgarri.
