Usansolok bere lehen aurrekontua kudeatuko du aurten, 8,9 milioi eurokoa
TESTUA ETA ARGAZKIA: Irati Alonso García
Usansoloko Udalak lehen aldiz kudeatuko du bere aurrekontua eta atzo, otsailak 27, kudeaketa batzordeak egindako osoko bilkuran eztabaidatu zituzten honen nondik norakoak. Guztira 8,9 milioi eurokoa izango da.
Usansoloko kudeaketa batzordeak atzo, otsailak 27, egin zuen osoko bilkura eta honetan, besteak beste, aurtengo aurrekontuaren inguruan eztabaidatu zuten alderdiek. Guztira 8,9 milioi eurokoa izango da eta lehen aldiz kudeatuko du bere kabuz Usansolok, iaz Galdakaoko Udalak eta Aldundiak egin zutelako.
Gobernu taldeko kideek azaldu dutenez, 8,9 miloi euroak hiru iturritatik jasoko ditu Usansolok: 4 milioi Udalkutxatik, 2 milioi zerga eta tasetatik, eta 3 milioi Galdakaoko gerakinetik.
Aurrekontua hainbat arlotara bideratuko da. Gastu arruntetarako 4.365.011 euro erabiliko ditu Usansoloko Udalak, besteak beste, zabor-zerbitzua bideen garbiketerako eta eraikin eta instalazio publikoen mantentze-lan eta garbiketarako.
Inbertsioetara aldiz, 2,5 euro bideratuko dira eta hauek izango dira batzuk: 600.000 euro Udala eta udal zerbitzuak kokatzeko erosi duten 700 metro kuadroko lokala egokitzeko, 400.000 euro udal brigadako materiala eta tresneria gordetzeko eraikin bat egokitzeko, 100.000 euro KZgunea guztiz berritzeko, 80.000 euro argiteria publikoa LED sistemara aldatzeko eta 62.000 euro kaleak urbanizatzeko eta asfaltatzeko.
Transferentzia arrunten kasuan 800.000 euro bideratuko ditu Usansoloko Udalak arlo hauetarako, esaterako: kultur taldeentzako dirulaguntzak, banakako pertsoneentzako dirulaguntzak, gizarte-larrialdetarako laguntzak eta etxeko laguntzak.
Aurrekontuaren beste zati handi bat langile hartuko dute, zehazki beste 800.000 euro. Idazkari eta kontu-hartzaile bat, hiru udaltzain, obretako brigadarako hiru pertsona, aparejadore bat, gizarte-langile bat eta administrari bat kontratatuko dituzte.
