Galdakao Futbol Taldeak neskei zuzendutako ate irekien jardunaldia antolatuko du eguenean
TESTUA: Irati Alonso García
ARGAZKIA: Galdakao Futbol Taldea
Neskei zuzendutako ate irekien jardunaldia antolatuko du Galdakao Futbol Taldeak Santa Barbarako futbol zelaian. Saioa eguenean, otsailak 20, izango da eta helburua «herrian emakumezkoen futbola sustatzea da».
Galdadakao Futbol Taldeak oinarrizko kategorietan emakumezkoen taldeak sortzeko nahia du eta horretarako «herrian emakumezkoen futbola sustatzea» beharrezkoa da. Helburu honekin hain zuzen, neskei zuzendutako ate irekien jardunaldia antolatuko du klubak eguenean, otsailak 20, Santa Barbarako futbol zelaian 17:30ean.
Batez ere 2012 eta 2017 bitartean jaiotako neskei zuzenduta egongo da jardunaldia, baina klubetik azaldu dutenez, «beste urte batean jaio bazara eta futbolean jokatu nahi baduzu, etor zaitez! Zuretzako lekua aurkitzen saiatuko gara».
Jardunaldi honetan, Pasa Baloia Neska programako teknikariak egongo dira. Programa hau Bizkaiko Foru Aldundiak, Athletic Clubek eta Bizkaiko Futbol Federakundeak sustatzen dute, eta Kimet Sport enpresak garatzen duen programa da, hain zuzen. «Entrenamendu ariketak, jolasak eta sorpresak egongo dira denontzat», adierazi dute Galdakao Futbol Taldetik.
