Galdakaoko 21 saltokik eskatu dute bertoko merkataritza sustatzeko dirulaguntza

TESTUA: Irati Alonso García
ARGAZKIA: Google Maps

Galdakaoko Udalak herriko saltokiei zuzendutako Biziberri dirulaguntza jarri zuen martxan joan den urtearen amaieran eta «oso balantze positiboa» izan du. Guztira, 21 saltokik egin dute eskaera.

Galdakaoko saltokiak azken urteetan izaten ari diren aldaketa sozialetara egokitzeko helburuz, Biziberri dirulaguntza jarri zuen martxan Udalak pasa den urteko amaieran. Guztira, 82.000 euro jarri zituen euren esku, denda berriak zabaltzen laguntzera eta aurretik zeudenak modernizatzera bideratuta.

Laguntzak eskatzeko epea amaituta, balantzea «oso positiboa» izan dela adierazi du Udalak. Guztira, 21 eskaera izan dira, 19 komertzio guneetan dendak berritu, modernizatu eta hobetzeko, eta 4 paisaia linguistikoa euskalduntzeko. Aipatutako dirulaguntzak bateragarriak dira, beraz, bi lerroak eskatu dituzten bi saltoki daude.

Profilari dagokionez, askotarikoa bada ere, modari, elikadurari eta zerbitzuei lotutakoak izan dira laguntza eskatu duten gehiengoak.

«Datozen urteetarako merkataritzaren erronka nagusietako bat herritarrek erosketak tokiko dendetan egitea da. Galdakaoko Udalaren apustua ere ildo beretik doa eta dirulaguntzen deialdi hau urtero errepikatzeko asmoa du. Izan ere, hurrengo deialdiei begira eskaria handitzea aurreikusten da, egindako inbertsioen eragin positiboak nabaritzen hasten direnean», azaldu du Udalak.