Galdakaoko ikasle eta ekintzaileen arteko topaketak antolatzen ari da Udala
TESTUA: Irati Alonso García
ARGAZKIA: Kala Studio
Galdakaoko Udalak DBHko 4. mailako ikasleen, Lanbide Heziketako ikasleen eta udalerriko ekintzaileen arteko topaketak antolatzen ari da. Lehenengo saioa urtarrilaren 15ean izan zen eta Bengoetxeko ikasleak Andra Mari Lanbide Heziketako ikastetxera joan ziren.
DBHko 4. mailako ikasleen, Lanbide Heziketako (LH) ikasleen eta udalerriko ekintzaileen arteko topaketak bultzatu ditu Galdakaoko Udalak, Andra Mari Lanbide Heziketako ikastetxearekin, Galdakaoko Ostalaritza Eskolarekin eta Bengoetxe, Elexalde eta Eguzkibegi bigarren hezkuntzako ikastetxeekin lankidetzan.
Lehenengo topaketa urtarrilaren 15ean izan zen eta Bengoetxeko ikasleak Andra Mari Lanbide Heziketako ikastetxera joan ziren. Jardunaldian zehar, LHko ikasleek hainbat proiektu aurkeztu zituzten, Ikasempresa ekimenaren barruan.
Bertan, fikziozko enpresa bat sortzen dute, ekintzailetzaren berezko mugarri guztietatik pasatuz. Aurkeztutako proiektuak askotarikoak izan ziren: sagardoa, sagar gozoa eta zukuak prestatzea, batetik, eta auto elektrikoentzako gurpilen fabrikazioa, mugikorrak kargatzen dituzten bizikletak eta adimen artifiziala erabiltzek duen aholkularitza, bestetik. Herrian sortu berri diren hiru enpresa ere bertan izan ziren: Kala Studio sormen estudioa, Solar-Gik eta Aldatzaile Inklusiboak.
Topaketa hauen helburua bikoitza da. Alde batetik, bigarren hezkuntzako ikasleak udalerriko LHko ikastetxeetara hurbiltzea, «ikastetxeen eskaintza zuzenean ezagutzeko aukera emanez». Eta, bestetik, ekintzailetzaren mundura hurbiltzea, «Galdakaoko ekintzaileek sortutako enpresen esperientzia batzuk aurkeztuz».
