Kultura
BINKE / 2022ko apirila

Galdakaoko Jai Batzordean parte hartzeko dei zabala egin dute

TESTUA ETA ARGAZKIA: Binke

Jai Batzorde galdakoztarrak hasi du Santakurtzetarako atzerako kontaketa, eta honen lan egiteko modua azaltzeaz gain, bertan parte hartzeko dei zabala egin diote gaur herriko edozein pertsonari, elkarte bateko kide izan zein ez izan. Baina, zelan har dezakezu parte Jai Batzordean? Hemen horretarako bost bide.

Iraileko Santakurtzei begira dago honezkero Galdakaoko Jai Batzordea. Aurtengo jaiak aldiz, ez dira betikoak izango, «pandemiaren bi urteren ondoren, etapa berri bati ekiten baitio» Santakurtzetako talde eragileak gaur Torrezabal Kultur Etxeko oholtzatik adierazi duen moduan.

Horregatik, «Galdakaon bizi den pertsona gisa, bai jaietako kuadrila bateko kide gisa, bai edozein elkarteko kide gisa» parte hartzeko dei zabala egin du gaur Jai Batzordeak Galdakaoko Udaleko kultur-teknikariekin batera.

«Jaiak zureak dira, eta zuk ere egin ditzakezu, urtero eraiki» aldarrikatuz Santakurtzen antolaketan parte hartzeko bost bide proposatu dituzte gaur, oholtzatik batzorde hau osatzen duten zenbait elkarteko ordezkariren presentzian:

Santakurtzetan eta Jai Batzordean parte hartzeko bideak

1. Jaietako jarduera berritzailea edo interesgarria iruditzen zaizuna egin nahi baduzu, Jai Batzordea «zu entzuteko eta ideia horiek zurekin baloratzeko irrikitan» dagoela esan dute. Horretarako galdakaokojaibatzordea2020@gmail.com helbidera idatzi dezakezu.
2. Boluntario parte hartu dezakezu. Proposamen «oso interesgarriak» daudela esan dute gaurko aurkezpenean, baina askotan hauek antolatzeko behar besteko jenderik ez dutela gaitzetsi dute. Horietariko batzuk dira, esaterako, talo txapelketa, malabare lehiaketa, patinete lasterketa, buruhandiak… baina ez dute nork antolatu. Horregatik, ekintza konkretu batzuetan parte hartzeko deia ere egin dute, nahi izanez gero.
3. Jai Batzordearen logotipoa diseinatu dezakezu. Garai berri honetarako, Jai Batzordeak logoa izan gura du, eta hori dela eta, laster logoa aukeratzeko lehiaketa publikoa egingo dute.
4. Kontzertuak bozkatu eta erabakiz. Kontzertu nagusiak zeintzuk izan daitezkeen proposatu eta ostean bozkatu dezakezu. Horretarako Udalak plataforma berria jarri du martxan, eta zabalik dago kontzertuak herritar guztien artean erabakitzeko epea.
5. Jai Batzordearen ohiko bileratara joanda. «Zuretzat ere irekita» dagoela azpimarratuz, Jai Batzordeko bileren egutegia edo xehetasunak jakiteko mezua idaztera animatu gura dituzte herritarrak, aurretik emandako helbide elektroniko berara idatzita: galdakaokojaibatzordea2020@gmail.com