Izaskun Rekaldek hitzaldia eskainiko du ‘Hezkuntza eta hizkuntza’ jardunaldian
TESTUA: Irati Alonso García
ARGAZKIA: Jabi Rojo
Apirilaren 22an ‘Hezkuntza eta hizkuntza’ jardunaldia antolatuko dute Bilbon eta honetan hainbat aditu arituko dira. Besteak beste, Izaskun Rekalde usansolotarrak hitzaldia eskainiko du, ‘Pantailak erdaraz, gazteak euskaldundu?’ izenburupean.
Manu Robles Arangiz Fundazioak eta ELA sindikatuak ‘Hezkuntza eta hizkuntza’ jardunaldia antolatuko dute Bilbon apirilaren 22an. Barrainkua 13 helbidean izango da 9:50tik 14:00etara eta hainbat adituk hitzaldiak eskainiko dituzte gai ezberdinen inguruan.
Besteak beste, pasa den otsailean Binkeko azalaren protagonista izandako Izaskun Rekalde arituko da Bilbon. Usansolotarrak solasaldia eskainiko du ‘Pantailak erdaraz, gazteak euskaldundu?’ izenburupean. Lanbide Heziketan eta EHUn irakaslen dabil gaur egun Rekalde eta Pantailak Euskaraz zein Binke proiektuetako sortzaileetariko bat da.
Rekaldez gain, beste hainbat aditu batuko dira jardunaldian. Hauek dira eskainiko diren saio guztiak:
- Miren Zubizarreta, ELAko Hezkuntza arduraduna: ‘Hezkuntza legearen aurreproiektuaz ELAren hausnarketa’
- Izaskun Rekalde, Pantailak Euskaraz proiektuko kidea eta EHUko eta LHko irakaslea: ‘Pantailak erdaraz, gazteak euskaldundu?’
- Iñaki Iurrebaso, soziologoa eta EHUko irakaslea: ‘Hezkuntzaren ekarpena euskararen biziberritzean’
- Jordi Martí, irakaslea era Intersindicaleko hezkuntza alorreko kidea: ‘La situació del catalá a Catalunya i la seua escola’ (Aldi bereko itzulpena)
- Juan Carlos Moreno, hizkuntzalaritza orokorreko katedrun ohia Madrilgo Unibertsitate Autonomoan: ‘El inglés en la escuela. ¿Cómo y desde qué edad?’
Jardunaldian parte hartzeko beharrezkoa da aurretik izena ematea euskarabatzordea@ela.eus helbidera idatziz.
