Usansoloko Meatzeta Bidea itxiko dute lau urtez, Metroaren obren ondorioz

TESTUA: Irati Alonso García
ARGAZKIA: Google Maps

Metroaren 5. linea eraikitzeko obrak hasi dira eta gure herrietan eragina izango dute hurrengo hilabeteetan. Besteak beste, lau urtez itxiko dute Usansoloko Meatzeta Bidea, Puentelatorren hasi eta Unkinara arteko tartean.

Metroaren 5. lineak geltokiak izango ditu Galdakaon eta Usansolon eta honezkero hasi dira hauek eraikitzeko obrak. Lanek eragina izango dute gure herrietan hurrengo hilabeteetan, BINKEk jaso zuen moduan.

Usansolotarrak izango da obren eragina nabarituko duten lehenak. Datozen egunetan Meatzeta Bidea erabat itxiko da bai ibilgailuentzat eta bai oinezkoentzat, Puentelatorren hasi eta Unkinara arteko tartean.

Galdakaoko Udalak jakinarazi duenez, bidea lau urtez itxita egongo da, izan ere, inguru horretan egongo da obrak egin ahal izateko lurrazpirako sarbideetako bat. Tunelak egiteko makinak hiru lekutan egongo dira eta bertan egongo da bat. Beraz, makina lurrazpian sartu eta bertatik lurra ateratzen arituko da. Horrek kamioien joan-etorria eragingo du, eta horregatik egongo da itxita bidea.

Obretako bulegoak, materialentzako biltegia eta langileentzako guneak ere egongo dira Usansolon. Zehazki, Beres enpresa zegoen lur eremuaren zati bat erabiliko da horretako eta hainbat kaseta izango dira bertan. Beste zatia aparkaleku publiko gisa erabiltzen jarraitu ahal izango da. Lurra egokitu egingo da horretarako eta aparkalekuak margotuko dira.