Eskola materiala erosteko dirulaguntza gaurtik martxoaren 4ra eskatu daiteke

TESTUA: Irati Alonso García
ARGAZKIA: Teaching Blog

Galdakaoko udalbatzak eskola materiala herriko saltokietan erosteagatik dirulaguntzak emateko oinarri arautzaileak behin betiko onartu zituen azken osoko bilkuran. Dirulaguntza gaurtik martxoaren 4ra bitarte eskatu daiteke eta albiste honetan batu dugu eskaera egiteko jakin beharreko guztia.

Eskola umeen gurasoek ikasturtearen gastuei aurre egiteko izaten dituzten zailtasunak arintzeko helburuz eta erosketak herriko dendetan egin daitezela sustatu nahian, familiei eskola materiala ordaintzeko dirulaguntza ematea erabaki zuen iaz Galdakaoko Udalak.

BINKEk jaso zuen moduan, Galdakaoko udalbatzak antolatu zuen azken osoko bilkuran onartu ziren dirulaguntza hauek emateko oinarri arautzaileak behin betiko, izan ere, Galdakaon horrelako neurri bat martxan jartzen den lehenengo aldia da hau.

Gaurtik martxoaren 4ra eskatu ahal izango dira dirulaguntzak eta irailaren 1etik eguenera, otsailak 15, bitarte egindako erosketak sartuko dira hauetan. Haur bakoitzarentzat 100 euro emango dira, erosketak Galdakaoko zein Usansoloko dendetan egindakoak izan behar dute, eta fakturak aurkeztu behar dira.

Hemen batu dugu eskola materiala erosteko dirulaguntzak eskatzeko jakin beharreko guztia:

-Nork eska dezake dirulaguntza?

• Adingabearen aitak, amak edo zaintza onartuta daukanak, edo ikasleak berak adinez nagusia bada. Galdakaon zein Usansolon erroldatuta egon beharko dute laguntza eskabidea egiten duten momentuan.
• Laguntzaren xede den ikaslea matrikulatuta egongo da honako mailaren batean: Haur Hezkuntzako Lehen Zikloko 2 urteko ikasgela, Haur Hezkuntzako Bigarren Zikloa, Lehen Hezkuntza, Derrigorrezko Bigarren Hezkuntza, Batxilerra, Lanbide Heziketa eta Hezkuntza-behar bereziak dituzten ikasleak.

-Zer erosketa mota sartzen dira dirulaguntza hauetan?

• Eskolako jardunerako beharrezkoak diren arropak: amantalak, uniformeak eta heziketa fisikorako kirol arropa eta oinetakoak.
• Teknologietako, Musika eta Heziketa Plastikoetako elementuak.
• Mahaigaineko materiala eta suntsigarriak: arkatzak, boligrafoak, ezabatzeko elementuak, klipak, zorrozkailuak, erregelak, eskuairak, kartaboiak, garraiagailuak, errotulkiak, koadernoak, folioak eta informatikako suntsigarriak.
• Material ez suntsigarria: sailkatzaileak, artxibategiak, estutxeak, kalkulagailuak, konpasak, eskolako bizkarzorroak, orri-bereizleak, hiztegiak.

-Nola aurkeztu daitezke eskaerak?

Eskaera behar bezala beteta eta eskatutako dokumentazioa Udalaren webgunean aurkeztu beharko dira edo ESAN herritarren arretarako bulegoan.

-Zein dokumentazio aurkeztu behar da?

• Eskabidea egiteko unean, eskatzaileak Galdakaoko edo Usansoloko saltokiren batean egindako faktura(k) izan beharko ditu. Materiala ikastetxean bertan erosi bada, eta beraz, ikaslea matrikulatuta dagoen ikastetxeak edo bertako gurasoen elkarteak emandako egiaztagiriak aurkezten badira, material hori Galdakaoko saltoki batean erosi dela egiaztatzen denean eta erosi duen pertsonaren identifikazioa behar bezala egiaztatzen denean bakarrik onartuko dira.
• Hartzekodunen orria (bankuko datuak), bankuan behar bezala zigilatuta aurkeztu beharko da.  Webgunetik bertatik deskargatu ahal izango da.
• Gainontzeko datuak Udalak berak egiaztatuko ditu bere datu basearen bidez, baina, norbaitek uko egin nahi badio administrazio honek datuak egiaztatzeari, honako dokumentu hauek ere aurkeztu beharko ditu: errolda ziurtagiria, eskola matrikulazioko ziurtagiria, eta zerga betebeharrak eta Gizarte Segurantzarekikoak egunean dituela egiaztatzen duen ziurtagiria.

Eskaerak aurkezteko epea amaitu eta beharrezko egiaztatze eta tramiteak amaitu ondoren egingo dira ordainketak, eskatzaileak zehaztutako kontu korrontean.