‘Eskolara bidean’ antzezlana hartuko du bihar Torrezabalek

TESTUA: Irati Alonso García
ARGAZKIA: Kulturklik

Campi qui pugui konpainiak ‘Eskolara bidean’ testu gabeko antzezlana eskainiko du bihar Torrezabal Kultur Etxean. Saioa 18:00etan izango da eta hiru ahizpen istorioa ezagutzeko aukera izango dute ikusleek.

Torrezabal Kultur Etxeak eskaintzen duen egitarau anitzaren baitan Campi qui pugui konpainia helduko da bihar, urriak 28, aretora. Taldeak ‘Eskolara bidean’ testu gabeko antzezlana eskainiko du.

Saioa 18:00etan hasiko da eta Aitana Guiralt, Cristina García eta Alícia Buil igoko dira Torrezabaleko oholtzara. Hirurek, Rosa Díazen zuzendaritzapean, hiru ahizpen istorioa aurkeztuko diote publikoari helburu batekin: etorkizuna eskuetan izatea.

«Ikuskizun iradokitzailea, bisuala eta testurik gabea, mundu osoko haurren benetako historian inspiratzen dena. Haur autonomoena, ikasteko gai direnena eta beren mundua aldatzeko gogoz daudenena», azaldu dute Udaletik.

Sarrerak eskuragai daude 4 eta 6 euro arteko prezioan Torrezabalen eta Udalaren webgunean.