Fiskaltzak 7 urteko kartzela zigorra eskatu du Fernando Izagirrerentzat, ustez 4,7 milioi euro faltsutzeagatik
TESTUA: Irati Alonso García
ARGAZKIA: Jose Sampedro, EFE
Fernando Izagirre galdakoztarrarentzat zazpi urteko kartzela zigorra eskatu du Fiskaltzak, ustez DYAko presidente zenean 4,7 milioi euro faltsutzeagatik. Fiskaltzak Izagirreri eta bere orduko bazkideari diru kopuru hori DYAra bueltatzea ere eskatu die.
Bilboko Instrukzioko bosgarren zenbakiko epaitegiak «zantzu sendoak» ikusi ditu Fernando Izagirre galdakoztarra akusatuen eserlekuan eseritzeko, El Correo egunkariaren arabera, ustez DYAko presidente zenean bi delitu egiteagatik: administrazio desleiala eta dokumentuen faltsutzea.
Fiskaltzak zazpi urteko kartzela zigorra eskatu du Galdakaoko Udaleko EAJko buru eta Eusko Jaurlaritzako Larrialdi eta Meteorologiako zuzendari izandakoarentzat. Gainera —orduko Diego Gallardo bere bazkidearekin batera—, DYAtik ustez eramandako 4,7 milioi euroak elkartera bueltatzea ere eskatu dio fiskalak.
Aipatutako egunkariak publikatutakoaren arabera, Fiskaltzaren ustez «egiaztatuta dago» Izagirre ados jarri zela bere bazkidearekin 2011 eta 2016 artean 4,75 milioi euroko etekin ekonomikoa lortzeko, eta diru kopuru hori DYAtik desbideratu zutela bere jabetzako Emerplus enpresara. Fiskaltzak gogorarazi du, halaber, DYA jendearen dohaintzetatik finantzatzen dela.
Kasu honetako epaiketarako datarik ez dago, baina bai ordea ahozko ikustaldia Izagirrek DYAko Kataluniako enpresa batzuetan kobratutako soldata bidegabeengatik —data horren berri eman ez bada ere—. Kasu honetako konkurtso-administratzaileak Global Formación Plus enpresan jasotako 210.000 euro inguru itzultzeko eskatzen dio.
