Galdakaon Euskaraldia koordinatzeko lehen bilera urtarrilaren 22an izango da
TESTUA: Irati Alonso García
ARGAZKIA: Otamotz
Euskaraldiaren laugarren edizioa maiatzaren 15etik 25era bitarte antolatuko da eta euskararen aldeko ekimena Galdakaon koordinatzeko lehen bilera urtarrilaren 22an egingo dute Udalak eta eragileek. Saioa udaletxean izango da eta herritarrak deitu dituzte parte hartzera.
Euskararen aldeko hizkuntza ohiturak aldatzea eta bere erabilerarako zailtasunak konponduko dituzten neurriak hartzea bultzatzen duen ariketa soziala da Euskaraldia eta laugarren edizioa aurtengo maiatzaren 15etik 25era antolatuko da.
Ekimena prestatzen hasi nahi dira Galdakaon eta horretarako lehen bilera egingo dute Galdakaoko Udalak eta herriko eragileek urtarrilaren 22an udaletxeko pleno aretoan 18:00etan.
Hitzorduan Euskaraldia koordinatzeko talde motorra martxan jarriko da eta bigarren erronka lortzeko oinarriak jarriko dira: maiatzeko ariketan lortutako aurrerapena egunerokoan mantentzea.
Horretarako, «ohikoa den elkarlan handiaz gain, herritarren inplikazioa funtsezkoa da». Hori dela eta, Udalak eta herriko euskalgintza eragileek deia egiten diete herriko talde eta eragile zein norbanakoei lehen bilera honetan parte hartzera.
«Hizkuntza dakitenek Euskaraldiaz gain egunero euskara erabiltzera ohitzeko arduren eta egitekoen ariketa sozialaren inguruko garrantzia» azpimarratu dute Udalak eta eragileek: «Hori lortzeko, bilera horietatik kanpo ere zer egina dago, ahaztu gabe ariketa nagusia norbere hizkuntza ohiturak errepasatzea eta berritzea dela».
