Gaur bozkatuko dute Bizkaiko Batzar Nagusietan Usansolo udalerri independente bilakatzea
TESTUA: Jon Gomez Garai
ARGAZKIA: Jose Asensio Larrinaga
Usansolo Galdakaotik segregatzearen alde bozkatuko dute laster 09:00etan, dena ondo bidean, Bizkaiko Batzar Nagusiek Gernikako juntetxean. Bertara gerturatuko dira autobusez dozenaka usansolotar, eta arratsalderako jai-egitaraua ere antolatu dute. Binkek usansolotar horiekin egingo du Gernikara bidaia, eta horren jarraipen berezia egingo dugu gure Twitter kontutik, zuzenean.
Iritsi da Galdakaotik segregatzearen alde dauden milaka usansolotarrek hainbeste urtetan espero izan duten eguna: Galdakaoko Udalaren babesa jasota eta Bizkaiko Foru Aldundiaren oniritziarekin, gaur bozkatuko dute Bizkaiko Batzar Nagusiek Usansolo Bizkaiko 113. udalerria bilakatzea gura duten ala ez. Dena ondo bidean, Bizkaian ordezkatuta dauden alderdien gehiengoak alde bozkatuko du.
Azken batzordeetako bozketei eta politikarien adierazpenei kasu eginda behintzat, gaur Batzar Nagusiek egingo duten Osoko Bilkuran Usansolo Bizkaiko 113. udalerri bilakatzea onartuko omen dute. Hala helarazi zieten ahoz 2021eko uztailean Herritarren Batzordean, hala adierazi zuen maiatzean Bizkaiko PP alderdiko idazkari nagusi Eduardo Andradek, hala onartu zuen Bizkaiko Foru Aldundiak berak ere eta baita Batzar Nagusien aurreko batzordeak ere, gaia bera Osoko Bilkuran bozkatu daiten. Noski, usansolotarren gehiengoak ere aurretik hala gura izan duelako galdeketa ofizial baina ez-loteslean —martxoaren 27an—.
Osoko Bilkura gaur egingo da Gernikako juntetxean, azaroak 23 dituela, eta batzarreko gai-ordenean zortzi puntutik lehena izango da milaka usansolotarren nahiari erantzungo diona: goizeko 09:00etan bozkatuko da «Galdakaoko Udalak bere lurraldearen zati bat banatzeko eta beste udalerri independente bat —Usansolo— eratzeko egindako eskaera».
Arratsalderako jaia
Azaroaren 23 honetan Usansoloren segregazioa bozkatuko dela, eta itxura denez Bizkaiaren onarpena jasoko dela, ospatzeko Usansolo Herria (UH) plataformak egun osoko egitaraua antolatu du egun bererako: goizeko 07:45ean autobusa hartuko dute dozenaka herritarrek Unkina plazan, elkarrekin Gernikara joan eta juntetxearen barnean zein atarietan batuko dira. Batzarrera 25 lagun inguru sartuko dira, eta gainontzeko guztiak kanpoan geratuko dira, guztira 100 lagun inguru batzea aurreikusten dute UH-koek Gernikan.
Arratsaldean berriz, 17:00etarako autoen karabana zaratatsua antolatu dute Meatzetako aparkalekutik hasita. Behin karabana amaituta, 18:00etan, «txokolateagaz txin-txina eta xanpainagaz topa!» egingo dute Unkina plazan, «barruak askatzeko», UH-k iragarritako kartelaren arabera. Eguna amaitzeko, 19:00etatik aurrera dantzaldia antolatu dute Luhartz taldearekin.
Goizak emango duenaren jarraipen berezia egingo du Binkek bere Twitter kontutik zuzenean.
