Mailaz igotzeko faseak lehiatuko dituzte Galdakao Boleibol Taldeko neskek eta mutilek
TESTUA: Irati Alonso García
ARGAZKIAK: Galdakao Bolei Taldea
Galdakao Bolei Taldeko neskek eta mutilek Lehen Maila Nazionalera igotzeko faseak lehiatuko dituzte asteburuan. Emakumezkoen taldea Leonen arituko da eta gizonezkoek aldiz etxean jokatuko dute, Urreta kiroldegian.
Denboraldi arrakastatsua izaten ari da Galdakao Bolei Taldearentzat. Apirilaren amaieran Euskadiko Boleibol Superkopa jokatu zuten neskek eta mutilek Urreta kiroldegian eta Binkek jaso zuen moduan, mutilak txapelketaren irabazleak izan ziren.
Emaitza onekin jarraitu du gizonezkoen taldeak ordutik eta horrenbestez Lehen Maila Nazionalera igotzeko fasea jokatuko du asteburuan Urreta kiroldegian. Gaur ADV Astilleroren kontra arituko dira 17:00etan, bihar CDV Burgosen aurka 10:00etan eta domekan RGC Covadongaren kontra 12:30ean.
Bestalde, neskek ere Lehen Maila Nazionalera igotzeko aukera izango dute asteburuan, kasu honetan Leonen. Gaur Cambados eta Auleren kontra arituko dira eta garaile izatekotan bihar finalaurrekoa eta domekan finala jokatuko dute.
