Mikel Crespok Alaves Gloriosas taldea entrenatzen jarraituko du
Kirola
BINKE / 2022ko ekaina
Mikel Crespok Alaves Gloriosas taldea entrenatzen jarraituko du
TESTUA: Erredakzioa
ARGAZKIA: Deportivo Alaves
Mikel Crespo entrenatzaile galdakoztarrak bigarren denboraldia egingo du Deportivo Alaveseko lehenengo taldea entrenatzen, pasa den barikuan horren berri eman zuten bezala.
Mikel Crespo galdakoztarrak Alaveseko lehenengo taldea entrenatzen jarraituko duela iragarri zen barikuan, ekainaren 3an. Horrela beraz, bigarren denboraldia egingo du entrenatzaileak Arabako lehenengo taldeko emakumeekin.
Binkeren 2022ko martxoko zenbakiaren protagonista nagusia izan zen Mikel Crespo, eta bertan jakinarazi zuen aldizkari honek bere ibilbidea: Galdakaoko Lanbide Futbol Eskolatik eta Lemoako Harrobi taldetik igaro ostean Deportivo Alaves klubean dabil buru-belarri Mikel Crespo entrenatzailea 2018-2019 denboralditik. Denboraldi hartan analista gisa sartu zen klubean, eta 2020ko otsailean taldea zuzentzeko ardura hartu zuen.
Orain, bigarren urtez, Alaves Gloriosas taldea zuzentzeko ardura izango du. Horrela iragarri du klubak berak bere webgunean: «Pasa den denboraldian igoera lortu ostean Primera Iberdrola mailara eta aurtengo urtean, mailari eutsi ondoren, bai teknikariak baita taledak ere, kontratua berritzea adostu dute».
