Santakurtzetako kontzertuak hautatzeko prozesua zabalik dago
TESTUA: Irati Alonso García
ARGAZKIA: Gaizka Peñafiel
Zabalik dago aurtengo Santakurtzetako kontzertuak proposatzeko prozesua. Herritarrek irailaren 8an, 9an eta 15ean Ardanza parkean egingo diren kontzertuak erabaki ahal izango dituzte galdeketa irekiaren bitartez apirilaren 26ra arte.
Azken urteetan bezala, Galdakaoko Udalak eta Jai Batzordeak herritarren esku utziko dute aurtengo Santakurtzetako kontzertuen aukeraketa. Horretarako gaur hasi den galdeketa irekia jarri dute martxan eta apirilaren 26ra arte izango dute herritarrek bozkatzeko.
Udalak jakinarazi duenez, irailaren 8an, 9an eta 15ean Ardanza parkean egingo diren kontzertuak erabaki ahal izango dituzte 16 urte gorako auzokide guztiek.
Pertsona bakoitzak bost proposamen egin ahal izango ditu gehienez eta parte hartzeko bi modu daude: Udalaren webgunearen bitartez edota Torrezabal Kultur Etxean, Aperribaiko liburutegian eta Urretako kiroldegian jarri diren hautesontzietan bozkatuz.
Jasotako proposamenen azterketa teknikoa apirilaren 27tik maiatzaren 2ra egingo dute arduradunek eta irizpide hauek izango dituzte kontuan:
- Taldearen katxea
- Disponibilitatea
- Aurreko hiru urteetan Galdakaon ez jo izana
- Taldearen behar teknikoak Galdakaoko behar teknikoetara egokitzea
Behin proposamenak batuta, hiru egunetako kontzertuetarako aukerak sortuko dira. Jai Batzordeak egingo du lan hori, maiatzaren 8an, eta hauek dira aukeraketa egiteko erabiliko dituen oinarriak:
- Emakumeen presentzia bermatzea
- Hizkuntza
- Aurreko hiru urteetan Galdakaon ez jo izana
- Estiloak
- Aurrekontura egokitzea
- Ez dira onartuko mezu edo jarrera diskriminatzaileak bultzatzen dituzten musika taldeak
Behin lehen aukeraketa eginda, berriz zabalduko da galdeketa herritarrei, egun bakoitzean joko duen taldea hautatzeko. Maiatzaren 8tik 18ra izango da hori eta berriz webgunean eta hautesontzietan bozkatu ahal izango da. Pertsona bakoitzak egun bakoitzerako talde bakarra bozkatuko du.
Irailaren 17an egingo den kontzertu nagusirako taldea Galdakaoko Udalak eta Jai Batzordeak aukeratuko dutela jakinarazi dute.
