Christian Arean Saratxaga
BINKE / 2018ko iraila

Sasi guztien gainetik

Euskerea ez da hizkuntza ofiziala Nafarroa osoan. Vascuencearen Legeak, inolako irizpide objektibori so eginez, hiru hizkuntza eremutan banatu eban lurraldea 1986an: zonalde euskalduna, mistoa eta ez-euskalduna. Egun, alegia, Foru Erkidegoaren heren batean baino ez da ofiziala. Ondoren, hamarkadetako hizkuntza-politika baztertzailea etorri zan. Euskerearekiko gorrotoa nortasun seinale bihurtu eban erregimenak, euskerea espazio publikotik desagerrarazten saiatu zana. Urteetan haizatutako «euskarafobia» gorrotoaren hazia erein eta sakondu dau herrialdean. Horren adibide argia da pasa dan ekainaren 2ko manifestazioa: milaka lagun euskerearen aurka Iruñeko kaleetan «en Navarra se habla castellano» oihuen artean. Hazia ereinda, aldaketaren gobernuak eginiko zenbait urratsek bazterrak harrotu dauz, bereziki espainolismo sutsuarenak. Aurretik, oraindik, Euskera Lege barri bat, berau Foru Erkidego osora zabalduko dauana; hori bai, tokian-tokiko errealitate soziolinguistikoari erreparatuz. Beste era batera esanda, egungo diskriminazioari amaiera emongo deutson legea, eskubide eta aukeren bardintasuna lurralde osora zabalduko dauana, eta, aldi berean, hizkuntzaren garapena babestuko dauana.