Zainketa aringarriei buruzko hitzaldia eskainiko du Julio Gomez Cañedo adituak Galdakaon
TESTUA: Irati Alonso García
ARGAZKIA: San Juan de Dios
Galdakaoko Udalak, herriko anbulatorioarekin lankidetzan, ‘Gure bizitzaren bidaia zaindu: ekipajea prestatzen’ hitzaldia antolatu du maiatzaren 8rako. Saioa Julio Gomez Cañedo medikuak eskainiko du eta Gandasegi eskolako areto nagusian izango da.
Zainduz programaren baitan eta herriko anbulatorioarekin lankidetzan, ‘Gure bizitzaren bidaia zaindu: ekipajea prestatzen’ hitzaldia antolatu du Galdakaoko Udalak. Topaketan «bizitzaren azken tarteari nola aurre egin eta horretarako zelan prestatu aztertuko da, bizitza etapa desberdinetatik igarotzen den zeharkaldi gisa ulertuz».
Saioa maiatzaren 8an izango da, Gandasegi eskolako areto nagusian 17:30ean. Sarrera doakoa izango da eta ez da beharrezkoa izena ematea.
Hitzaldia Julio Gomez Cañedo medikuak eskainiko du, Santurtziko San Juan de Dios ospitaleko zainketa aringarrien zerbitzuko koordinatzailea 20 urte baino gehiagoz izandakoak. Ospitale bereko Arreta Psikosozialeko taldeko zuzendaria ere bada 2008 urtetik.
Gomez zainketa aringarrietan espezializatu zen 2004an Deustuko Unibertsitateko graduondoarekin eta 2006an Valladolideko Unibertsitateko masterrarekin. Profesionala Arinduz Euskadiko Zainketa Aringarrien Elkarteko lehendakariordea da.
Nazioarteko esperientzia ere badauka eta bere bizipen guztiek «bizitzaren bidaiari buruzko ikuspegi ugari eta azken etaparako prestatzeko modu ezberdinak eman dizkiote». «Beraz, ezagutza erabilgarriak eta laguntza emango dizkie gaixotasun larriak edo sendaezinak dituzten pertsonen senideei eta zaintzaileei, bizitzaren tarte horri ahalik eta modu naturalenean aurre egin diezaioten», adierazi dute Udaletik.
