Zuberoako Maskarada plazaratuko du Andra Marik otsailaren 22an, egun osoko egitarauarekin

TESTUA: Irati Alonso García
ARGAZKIA: EKE

Taldearen 70. urteurrena ospatzeko egitarau bereziaren baitan, Zuberoako Maskarada plazaratuko du otsailaren 22an Andra Marik bere osotasunean. Egun osoko egitaraua prestatu du taldeak eta gaur da herri bazkarirako tiketak eskuratzeko azken eguna.

Andra Mari Dantza Talde galdakoztarrak 70 urte bete ditu aurten eta urteurrena ospatzeko egitarau berezia prestatu du, urte osoan zehar eskainiko dituen ekintzekin, BINKEk jaso zuen moduan.

Programa honen baitan, otsailaren 22an Zuberoako Maskarada bere osotasunean plazaratuko du Andra Marik. «Hainbat urtetako lanaren ostean taldeak plazara atarako du Zuberoako inauteririk esanguratsuena, eta horrek hogeita hamar pertsona baino gehiagoren inplikazioa eskatu du; aktiboan dauden dantzariez gain, taldekide ohiek eta belaunaldi berriek ere hartuko dute parte ikuskizunean, talde guztia batuta», azaldu dute taldetik.

Egun osoko egitaraua prestatu du Andra Marik otsailaren 22rako, ordutegi hauekin:

Barrikadak:

10:00 Ardanza parkean
10:45 Kurtzeko plazan
11:30 Iturrondo plazan
12:15 Santi Brouard enparantzan

Herri Bazkaria:

13:30 Tiketak eskuragai Gangurenen, Zurruten eta Herriko Bentan (gaur, otsailak 14, da erosteko azken eguna)

Ofizioak:

16:30 Santi Brouard enparantzan